⁣

Fantany cudoŭnym čynam pieratvarajuć abličča liuboha horada.

Svaimi chalodnymi strumieniami jany ŭdychajuć u jaho novuju enierhiju, ažyŭliajuć architekturu. Kalia fantanaŭ liudzi pryznačajuć sustrečy, prychodziać siudy adpačyć i prosta paliubavacca na hety cud inžyniernaj dumki.

Siońnia ŭ Minsku boĺš za sto fantanaŭ, i z kožnym hodam ich koĺkaść raście. Fantany stanoviacca boĺš mahutnymi i nadzvyčaj pryhožymi, uskladniajucca miechanizmy kiravańnia imi.

Boĺšaść minskich vadamiotaŭ — tak fantany nazyvali raniej — maje vialiki ŭzrost. Samy stary sa staličnych fantanaŭ — «Chlopčyk z liebiedziem» — byŭ adkryty ŭ Aliaksandraŭskim skviery ŭ 1874 hodzie. Jaho źjaŭlieńnie źviazana sa zdačaj u ekspluatacyju pieršaha haradskoha vodapravoda. U tyja časy nie kožny hubiernski horad moh dazvolić sabie mieć taki fantan.

Šmat vodnych kampazicyj bylo pabudavana ŭ stalicy Bielarusi ŭ šaścidziasiatyja — siamidziasiatyja hady minulaha stahoddzia. Tady jany raźmiaščalisia na ploščy Svabody, kalia Palaca pijanieraŭ i škoĺnikaŭ (ciapier Respublikanski centr tvorčaści dziaciej i moladzi), u parku Horkaha.

U parku Janki Kupaly ŭ lietniuju śpioku doryć prachalodu i śviežaść fantan «Vianok» sa skuĺpturnaj hrupaj dziaŭčat, jakija varožać na Ivana Kupalu. U 1972 hodzie hety fantan byŭ pierabudavany da 90-hoddzia z dnia naradžeńnia Janki Kupaly. Kampazicyja fantana pieradaje maliaŭničuju karcinu: nad basiejnam kruhlaj formy śchililisia bronzavyja fihury dziaŭčat, jakija kidajuć u vadu vianki.

Štohod u sučasnym Minsku aficyjna adkryvajecca siezon fantanaŭ.

Papiarednie śpiecyjalisty robiać kaśmietyčny ramont vadamiotaŭ, uparadkoŭvajuć ich, naladžvajuć abstaliavańnie. Tradycyjna vodnaja fiejeryja startuje ŭ stalicy na Śviata pracy. Napryklad, fantany na ploščy Niezaliežnaści i kalia Nacyjanaĺnaha akademičnaha Vialikaha teatra opiery i balieta abudžajucca pad uračystyja huki duchavych arkiestraŭ.

Kožny fantan u Minsku asablivy. Napryklad, samym bujnym ličycca fantan kalia teatra opiery i balieta. Kab zapoŭnić jaho, patrebna boĺš za trysta tysiač litraŭ vady. Niahliedziačy na značnyja habaryty, jon sama daskanalaść. Zhodna z zadumaj architektaraŭ, viertykaĺnyja strumieni, uźliatajučy ŭhoru, paŭtarajuć siluet budynka teatra. Prazrystaja viačerniaja padśvietka nadaje vodnaj kampazicyi biazvažkaść.

Na ploščy pierad Kamaroŭskim rynkam znachodzicca kazačny fantan, što nie raz pryznavaŭsia najliepšym u stalicy. Jon zroblieny ŭ vyhliadzie nievialikaj horki, kalia jakoj kupajucca dźvie bronzavyja husi.

Varty zachaplieńnia fantan kalia Palaca sportu. Jon zdoĺny stvarać śvietlavoje muzyčnaje šou i tancavać u rytm mielodyi.

Kiravańnie im viadziecca sa śpiecyjaĺnaha punkta i amaĺ calkam padparadkoŭvajecca kampjutaru.

Na Kamsamoĺskim voziery zapuščany fantan na vadzie.

Maksimaĺnaja vyšynia jaho strumieniaŭ — dvaccać mietraŭ. U chutkim časie na haloŭnaj aliei novaha parku Pieramohi raźmieściacca dva fantany.

Sustrakać naviedvaĺnikaŭ budzie mahutny fantan «Pieramoha». Jaho centr upryhožyć skuĺpturnaja kampazicyja z simvaličnymi jazykami polymia. Za im źjavicca «zadumlivy» fantan «Viečnaść», vyšynia strumieniaŭ jakoha dasiahnie tryccaci mietraŭ. Uviečary fantany buduć aśvietlieny śpiecyjaĺnaj padśvietkaj.

Jašče adzin vidoviščny fantan-šyrmu pabudujuć kalia Nacyjanaĺnaj biblijateki. Vyhliadać jon budzie prykladna tak: nad hladdziu raki ŭźnimiecca pavietrana-vodny ekran taŭščynioju ŭsiaho try milimietry, na jaki z dapamohaj laziera možna prajecyravać liuby pradmiet ci znak.

Slovam, z kožnym hodam staličnyja fantany stanoviacca ŭsio boĺš daskanalymi. I ŭ nas jość cudoŭnaja mahčymaść atrymać asalodu ad ich charastva.